Soldado sa Passi City nadakpan nga naglapas sa Comelec gun ban
ILOILO — Nagdugang sa listahan sang 27 ka Comelec gun ban violators sa Western Visayas ang miyembro sang Philippine Army nga nadakpan sa Passi City.
Ini ang base sa report sang Police Regional Office 6 as of February 2, suno kay spokesperson Lt Colonel Arnel Solis.
Assigned sa 552nd Engineering Construction Battalion sa Dingle ang 26-anyos nga soldado kag nagarango sang Private First Class.
Ginpahayag ni Police Master Sergeant Roderick Larida, imbestigador sang Passi City Police Station nga nag-report ang live-in partner sang soldado las-10 sang Sabado sang gab-i nga ginsakit siya sang suspek gani nagresponder ang police, SWAT team sa Passi City sa Brgy. Magdungao.
Ginpahayag sang police nga mga las-12:30 na sa kaagahon sila nakaabot sa lugar sa diin base sa ila assessment, nakainom sang makahulubog nga ilimnon ang suspek.
Sang arestuhon na ang soldado, gulpi lang siya nagkuha sang armas nga natungtong sa pulungkuan sa guwa sang ila balay tubtob gin-agaw sang SWAT member. Na-recover ang caliber 45 pistol.
Gin-detain ang soldado sa Passi City Police Station kag pasakaan sang kaso nga paglapas sa R.A. 9262 ukon violence against women and their children (VAWC)
Ginapreparar naman ang kaso nga RA 10591 ukon Comprehensive Firearms and Ammunition Regulation Act in relation sa Comelec gun ban. — Aksyon Farrah Mae Morano
