(UPDATE) Ginkumpirmar sang Philippine Institute of Volcanology and Seismology (PHIVOLCS) La Carlota Substation nga lahar ang nagdaludo sa Brgy. Biak-na-Bato, La Castellana kag iban pa nga lugar malapit sa Kanlaon Volcano kahapon sang hapon.
Suno kay Daryll Arro, Science Analyst sang PHIVOLCS-La Carlota Substation, nakumpirmar ini pagkatapos sang ginhimo nga test kag assessment sang ila nga team. “Confirmed [after the test] nga lahar [ang nagdaludo kahapon]. Ang lahar combination ina sang acid kag volcanic debris nga gin-wash out halin didto sa ibabaw sang bulkan. Ang affected nga lugar, mostly diri sa southern [part] sang Mt. Kanlaon.”
Antes sini, ginpa-athag ni Arro nga mud flow ang natabu ukon pagdaludo sang tubig nga may dala nga abo halin sa bulkan.
Nahibaluan nga nagtupa ang mamunog nga ulan sa Mt. Kanlaon sang Martes sang gab-i nga nagresulta sa pagdaludo sang lahar.
Nagpanugyan naman si Arro sa mga residente malapit sa 4-kilometer radius permanent danger zone sang Kanlaon nga mag-evacuate kun kinahanglan kag indi paghulaton nga maglala ang sitwasyon.
Ginpasalig sang PHIVOLCS La Carlota Substation nga padayon ang ila monitoring sa aktibidad sang bulkan.
Magluwas sa La Castellana, na-record man ang lahar flow sa mga barangay sa Canlaon City, Negros Oriental sa tiilan sang bulkan, kag naglab-ut man ang lahar sa Guintubdan waterfalls sa Barangay Ara-al, La Carlota City. —via BBB
