LTO 6 nag-deploy sang team sa Iloilo Sunset Boulevard agud magbantay sa mga naga-inom sang makahulubog nga ilimnon
Ginbantayan sang team sang Land Transportation Office ukon LTO 6 ang Iloilo Sunset Boulevard kagab-i, Pebrero 3.
Ini sang ginpahayag ni LTO 6 Director Gaudioso Geduspan agud mabantayan ang mga naka-inom sang makahulubog nga ilimnon.
Nangin issue suno sa iya ang pag-park shot ukon ang pag-inom sang makahulubog nga ilimnon sa parked vehicle sa Iloilo Sunset Boulevard kag naga-drive pagkatapos. Nagdala sang breath analyzer ang taga-LTO 6.
Magluwas sa taga-LTO, nagbantay man ang kapulisan kag mga personnel sang Traffic and Transportation Management Office.
Una na nga ginmandu ni Mayor Jerry Treñas nga dumilian ang pag-park shot sa lugar.
Base sa obserbasyon sang Aksyon Radyo Iloilo news team, diyutay lang ang tawo nga nagpadulong sa lugar kun gab-i.
Sugod nga ginbuksan sa publiko ang proyekto, nagdugok ang mga tawo kun weekend. — Aksyon Farrah Mae Morano
