P400,000 nga balor sang suspected shabu na-recover sa drug buy bust sa Molo

ILOILO CITY — Na-recover ang P400,000 nga balor sang suspected shabu sa tatlo ka babaye kag isa ka miyembro sang LGBTQIA+ sa buy bust operation sa Zone 2 San Juan, Molo kagab-i, Pebrero 12.

Suno kay PLt. Lloyd Pagulayan, deputy chief sang Police Station 4, sang 2024 pa na-monitor sang kapulisan ang main target nga ginkilala kay alyas Aby.

Sa monitoring sang police, napreso sa Bureau of Jail Management and Penology- Ungka ang pila ka miyembro sang pamilya ni Aby tungod nadakpan sa buy bust operation sadtu.

12 ka sachet sang suspected shabu ang na-recover sa operasyon kag nagabalor sang P400,000.

Suno naman kay Barangay Kagawad Joni Enojado sang San Juan, Molo, duha sa mga nadakpan ang tumandok sang barangay.

Ginpabutyag ni Enojado nga wala nalakip sa monitoring kag listahan sang Barangay Anti-Drug Abuse Council (BADAC) ang ngalan sang duha.

Base sa monitoring sang barangay, wala sang impormasyon nga naga-engage sa ilegal nga aktibidad ang duha. — Aksyon Paula Elambayo