“Nga-a Ikaw: The Aksyon Radyo Iloilo Job Interview” nagsugod na; former Councilor Lyndon Acap una nga nagplastar sang iya mga prayoridad kag plataporma para sa midterm elections
Ginlunsar sang Aksyon Radyo Iloilo ang “Nga-a Ikaw: The Aksyon Radyo Iloilo Job Interview” para sa mga local aspirants sa siyudad kag probinsya sang Iloilo sa 2025 midterm elections.
Ini tungod sa pagpati nga ang palangakuan sa gobyerno daw kaangay sa pag-apply sang trabaho.
Ang nasambit nga programa nagahatag sang palaagyan sa mga kandidato nga sang ila mga plano kag handum kon mapilian sa palaabuton nga eleksyon.
Magatalakay man ini sang panindugan kag panan-awan sang kandidato sa mga isyu nahanungod sa interes sang publiko.
Katuyuan sang programa nga maghatag sang giya sa mga botante sa pagpili sang nagakadapat nga lider sa palaabuton.
Himuon ang “Nga-a Ikaw: The Aksyon Radyo Iloilo Job Interview” paagi sa alphabetical order sang mga aspirants.
FORMER COUNCILOR LYNDON ACAP
Madugay nga ginpreparahan ni former Councilor Acap ang pagserbisyo sa mga pumuluyo sa siyudad kon basehan ang iya track record sa panghimanwa.
Ini ang ginbida sang anay konsehal sa pagsabat niya sang mga pamangkot sa “Nga-a Ikaw: The Aksyon Radyo Iloilo Job Interview”, ang programa nga nagahatag sang palaagyan sa mga kandidato sang ila mga plano kag handum kon mapilian sa palaabuton nga 2025 midterm elections.
Ginpahayag ni Acap nga antes siya nangin konsehal, nagserbi siya bilang barangay kagawad kag nangin kapitan.
Magluwas nga graduate siya sa kurso nga medical technologist, nagkuha man siya sang master’s degree sa public administration bilang preparasyon sa iya pagsulod sa konseho.
Sa kinse ka tuig nga pagserbisyo ni Acap bilang konsehal sadtu, ginapabugal niya nga madamo siya sang hinimuan, wala sang dagta ang iya pangalan, may panindugan kag sinsero sa panghimanwa
IDUSO NGA ORDINANSA
May napaminsaran na nga ordinansa si former City Councilor Acap nga plano niya iduso sa City Council kon mahatagan siya ang tsansa nga makabalik liwat sa konseho sa palaabuton nga 2025 midterm elections.
Ginpahayag ni Acap nga ang iduso niya nga ordinansa may kaangtanan sa mga lapsag ilabe na ang mga bag-o ginbun-ag nga ginahaboy sa bisan diin lang.
Kinahanglan ini suno sa iya nga mahatagan sang espesyal nga atensyon gani nagalaum siya nga suportahan in ikon mangin mapalaron siya sa palaabuton nga eleksyon.
Lakip man sa plano ni Acap ang pagduso nga himuon compulsory ang membership sang mga indibidwal pag-abot sa edad nga 60 kag salalama nga paghatag sang senior citizens’ pension, indigents man ukon indi.
Iduso man niya ang mga tikang nga makabulig sa pagpahagan-hagan sang climate change paagi sa pagtanum sang mga puno sang kahoy, pagpaninlo sang mga suba kag drainage system.
ISSUE SA MOHON TERMINAL
Ginatinguhaan sang pamilya Acap nga mapa-improve ang mga pasilidad sa Mohon terminal bilang pagsunod sa guidelines nga gintalana sang modernization program sang gobyerno.
Ini ang sabat ni former Councilor Acap sa tunga sang mga reklamo sa indi maayo nga sitwasyon sang terminal.
Ginpaathag sang anay konsehal nga lakip sa improvement ang pagsemento sang dalan, pagbutang sang arrival, waiting kag departure areas subong man CR para sa mga babaye ilabe na sa mga PWDs kag senior citizens.
Ginpabutyag sang konsehal nga daku nga kantidad ang kinahanglan para sa improvement pero amat-amat na ini nga ginatuman.
Mas maayo pa suno sa iya ang mga transport cooperatives ukon corporations tungod may ginabaton nga subsidy, pero ang mga magagmay nga terminal pareho sa Mohon terminal ang wala sang may ginabaton nga bulig halin sa gobyerno.
