ILOILO — May koneksyon sa New Bilibid Prison (NBP) sa Manila ang parlorista nga nakuhaan sang P3.5 million nga balor sang suspected shabu sa drug bust operation sa Barangay Daga, Sta. Barbara Biyernes sang gab-i, Mayo 31.
Suno kay Police Captain Glenn Soliman, chief sang Regional Police Drug Enforcement Unit (RPDEU) 6, may contact sa NBP ang subject nga si alyas Bing, 45-anyos nga amo ang nagahatag sa iya sang instructions kon may magbakal sang illegal nga druga.
Nagpamalibad naman si Soliman sa paghatag sang ngalan sang inmate nga nagahatag sang instructions sa subject pero nagguwa na ang iya ngalan sa mga ginasugid nga source sang una na nga mga nagkaladakpan sa drug bust operations.
Dugang niya, gin-ako man ni Bing nga gina-pick up niya sa Ceres Terminal ang illegal nga druga pero nagpamalibad na maghatag sang dugang nga detalye kon paano ini nagalab-ut sa siyudad.
Ginpabutyag ni Soliman nga nagaserbe “bodegera” sang illegal nga druga si Bing kag ginagamit ang iya negosyo nga parlor agud matago ang iya ginahimo nga illegal nga mga transaksyon.
Sa monitoring sang police, mga players sa siyudad kag probinsiya sang Iloilo ang nagakuha sang illegal nga druga kay Bing.
Na-recover sa operasyon ang walo ka dalagko nga pinutos sang suspected shabu nga ginabanta nagabug-at sang 525 grams ukon masobra tunga sa kilo nga may standard drug price nga P3,570,000. — Aksyon Maria Kayla Tingzon
