Pamilya ni alyas Kendi nga gin-rape kag ginpatay sa Tubungan, nagapanawagan sang lubos nga hustisya; Alyas Kendi ginlubong na kahapon

ILOILO — Tuman ang pag-urahab ni Alyas Fe sang ginlubong si Alyas Kendi, ang 18-anyos nga dalaga nga gin-rape kag ginpatay sa Brgy. Ingay, Tubungan sang Hunyo 17 sang kaagahon.

Sa patyo gulpi lang nga nag-uy oy ang iloy samtang ginapangamuyuan ang bangkay sang iya bata antes ilubong sa Tubungan Municipal Cemetery kahapon sang aga.

Antes sini, sa obserbasyon sang Aksyon Radyo Iloilo news team, nagahilibiun na ang iloy kag tatlo pa niya ka kabataan sa guwa pa lang sang simbahan kag pagkatapos sang misa. Magluwas sa iban nga himata sang pamilya, nagkumpanyar man ang mga classmates kag abyan ni alyas Kendi nga kadamuan sa ila ang naghilibion man.

Hapon na sang Hunyo 17 sang nasapwan sang iloy ang bangkay ni alyas Kendi sa sulod kwarto, may tabon nga habol kag wala na sang underwear.