Ma-arte man tulukon pero wala naga-inarte pag-abot sa orbahanay.
Ini ang ginpasiguro ni Iloilo Vice Gov. Lee Ann Debuque sa iya inaugural speech sa oath-taking ceremony nila ni Gov. Arthur Defensor, Jr.
Suno kay Deque, handa siya nga magserbisyo sa probinsiya kag mag-obra para sa mga Ilonggo.
Ginpasalig niya man nga suportahan ang mga proyekto ni Gov. Defensor agud malab-ot ang iya mga handum nga mapasanyog pa ang probinsiya.
Handa man siya magbulig sa gobernador kon may idugang pa siya nga lab-uton sa iya katapusan nga termino.
Excited man si Debuque nga makatrabaho ang mga miyembro sang 15th Sanggnuniang Panlalawigan tungod suno sa iya, natapos na ang pamulitika kag tion na sang panghimanwa kag pagbinuligay para sa kaayuhan sang probinsiya.
Indi man malipatan ni Debuque ang iya mga inagyan sang nag-umpisa siya sang iya kandidatura sa pagka-bise gobernador.
Ginbalikan niya ang mga adlaw kun paano siya ginpili ni Gov. Defensor bilang running mate kag kon paano niya ginpakilala ang iya kaugalingon ilabi pa nga madamo ang wala pa gid lubos nga nakakilala sa iya. — Aksyon Khenjo Terco
