ILOILO — Patay ang 27-anyos nga pulis nga driver sang motorsiklo samtang pilason ang angkas sang nakabunggo sa pick-up sa Brgy. Duyong, Pandan, Antique sang Hulyo 5.

Suno kay Police Lieutenant Allan Otis, deputy chief of police sang Pandan Municipal Police Station, nakita sa CCTV footage nga nagabalikid sa iya angkas ang pulis samtang nagamaneho pakadto sa direksyon sang Libertad, Antique.

Tungod sini, naglapaw sa linya ang motorsiklo kag nakabunggo sa pick-up.

Ginpahayag sang police nga malayo pa lang sang nakit-an sang driver sang pick-up ang motorsiklo gani ginbusinahan niya.

Gintinguhaan sang driver sang pick-up nga likawan ang motorsiklo pero nalab-ut gid.

Nabali ang duha nga tiil kag napilasan ang tuo nga mata sang pulis nga napatay samtang ginabulong sa ospital. Nagapabilin sa ospital ang angkas kag estable na ang kondisyon suno sa police.

Gin-detain sa Pandan Police Station ang driver sang pick-up pero gin-release sang police tungod may settlement nga natabo sa tunga sang pamilya sang napatay nga pulis.

Nagaranggo nga patrolman ang pulis nga taga-Brgy. Culasi, Ajuy kag na-assign sa 2nd Antique Provincial Mobile Force Company (APMFC). — Aksyon Paula Elambayo