P2.7 million nga suspected shabu na-recover sa drug buy bust sa Cabatuan

ILOILO — Na-recover ang P2.7 million nga balor sang suspected shabu sa drug buy bust operation sa Barangay Janipaan Olo, Cabatuan las-7:15 kagab-i.

Nadakpan sa anti-illegal drug operation kanday Noel Deseda, 32-anyos nga residente sang nasambit nga barangay kag Jerry Bendol, 44-anyos sang Barangay Damo-ong, Janiuay nga ginakabig High Value Individual (HVI) kag Joyce dela Rosa, 20-anyos sang Cadagmayan Sur, Sta. Barbara nga ginakabig naman nga Street Level Individual (SLI).

Lakip man sa nadakpan ang isa ka ginpahayag menor-de-edad.

Nakuha sa mga subjects ang 21 ka sachets kag walo ka dalagku nga pinutos sang suspected shabu nga ginabanta nagabug-at sang 400 grams.

Magluwas sa illegal nga druga, nakumpiskar kay Deseda ang Caliber .38 nga may tatlo ka bala, samtang nakuha kay Bendol ang 12-gauge shotgun nga may 12 ka mga bala. — Aksyon Maria Kayla Tingzon