ILOILO — Duha ang na-record nga napatay sa lima ka magkatuhay nga aksidente nga nagluntad sa siyudad kag probinsiya sang Iloilo sang Hulyo 10.
Sa PAVIA, patay ang 23-anyos nga driver sang motorsiklo sang nakabunggo sa center island sa Brgy. Mali-ao pasado las-tres sang kaagahon. Naka-inom sang makahulubog nga ilimnon si Alyas Van sang natabo ang aksidente.
Sa OTON, patay ang 28-anyos nga seaman sang nabungguan sang pick-up ang ginamaneho nga bisikleta sa Circumferential Road 1 nga sakop sang Brgy. Pakiad mga las-6:30 sang aga. Ginamaneho sang 21-anyos nga lalaki ang pick-up.
Suno sa Oton police, ginpasakaan sang kaso nga reckless imprudence resulting to homicide and damage to property ang suspetsado nga preso na sa Oton Municipal Police Station.
Sa ILOILO CITY, napilasan sa wala nga butkon ang 76-anyos nga German national sang nabungguan sang hauler truck ang ginamaneho nga multicab sa Iloilo Sunset Boulevard nga sakop sang Circumferential Road 1, Brgy. So-oc, Arevalo mga las-8:45 sang aga. Ginpaidalum sa custodial investigation ang driver sang hauler truck.
Sa IGBARAS, natumba ang truck nga may karga nga kawayan sa Brgy. Jovellar mga pasado las-12 sang udto. Suno sa Igbaras police, pakadto sa Oton ang truck sang naglupok ang panguna nga goma sa wala, rason nga natumba.
Nakaagum sang minor injuries ang duha ka pahinante sang truck.
Sa STA. BARBARA, nakabunggo sa center island malapit sa entrance sang Iloilo International Airport ang Ceres bus nga sakop sang Brgy. Duyan-Duyan mga las-2:30 sang hapon. Wala sang may napilasan nga pasahero sang nagluntad ang aksidente.
Suno sa Sta. Barbara police, nadulaan sang kontrol sa manibela ang driver gani nakabunggo sa center island. Halin sa Capiz kag padulong sa Iloilo City ang Ceres bus sang naaksidente.
Una na nga nagpanawagan ang Iloilo Police Provincial Office (IPPO) sa mga motorista nga siguruhon gid ang safe driving agud malikawan ang aksidente sa dalanon.
