ILOILO— Wala sang may nakita nga external physical injuries sa lawas ni Patrolman Dande Luis Tayhon, ang pulis nga nasapwan nga nagalutaw sa Iloilo River sang Hulyo 20.
Ini suno kay Dr. Nick Botin, Medico Legal Officer sang National Bureau of Investigation (NBI) 6, base sa resulta sang autopsy sa bangkay.
Ginpaathag ni Dr. Botin nga tungod nagdugay na sa tubig ang lawas sang pulis, naglain na ang color kag nakakas na ang panit ukon yara na sa decomposition.
Ginabanta nga masobra 24 oras na nga napatay ang pulis antes nasapwan sa suba.
Dugang ni Dr. Botin, wala sang may nakita nga signs sang external trauma kag wala man sang hematoma halin sa ulo tubtob sa lawas sang pulis.
May balas sa iya nga lawas, wala sang unod ang tiyan, wala sang urine sa bladder, kag wala sang may napanimahuan nga alcohol.
Ang rason sang kamatayon suno kay Dr. Botin amo ang pagkalumos ukon “Compatible with asphyxia by drowning.”
Si Tayhon ang tumandok sang Brgy. Tayawan, Bayawan City, Negros Oriental.
Assign si Tayhon sa Regional Communications and Electronics Unit (RCEU) 6 pero masaylo na siya sa RCEU-Negros Island Region kag subong nga adlaw kuntani maga-report sa iya bag-o nga assignment. — Aksyon Farrah Morano
