ILOILO — Patay ang 18-anyos nga lalaki sang natiruhan sa Brgy. Bolong Este, Sta. Barbara pasado Hulyo 22 sang gab-i.
Suno sa iloy, nakainom sang makahulubog nga ilimnon ang iya bata sang nagpauli sa ila balay. Nakibot ang iloy sang gulpi siya ginsumbag sang iya bata sa wala nga butkon.
Tungod sini, nagguwa sa ila balay ang iloy kag nagkadto sa balay sang iya manghod agud magpangayo sang bulig.
Nagtawag sang barangay tanod ang manghod sang iloy agud maistoryahan sa barangay hall ang natabo.
Pag-abot sang mga tanod, ginpangita nila ang lalaki pero wala nakita.
Ginpahayag sang iloy nga wala na sila nakahibalo kon diin nagkadto ang iya bata tubtob nga nagpahibalo ang mga tanod nga magkadto sa balay sang ila kasilingan.
Nagatambihanay ang balay sang 18-anyos nga lalaki kag ang kasilingan kon diin siya nasapwan.
Sa pagpangusisa sang Aksyon Radyo Iloilo, nagahapa sa likod sang balay sang kasilingan ang lalaki kag may pilas sa ulo. — Aksyon Paula Elambayo
May nabatian nga lupok ang mga residente kadungan sang mamunog nga ulan kagab-i gani wala gid nila matalupangdan kon lupok sang pusil kag nagdumdom nga may naglupok lang nga poste sang kuryente.
Padayon ang imbestigasyon sang Sta. Barbara police sa natabo.
