Pilason ang 56-anyos nga lalaki sang gintiro sa atubang sang ila balay sa Brgy. Sulangan, Dumangas kahapon sang hapon, Hulyo 27..

Suno kay Police Senior Master Sergeant Efren Gonzaga Jr., imbestigador sang Dumangas Municipal Police Station, nagapungko sa motorsiklo ang biktima nga si Samuel Adelantar tungod ginahulat ang iya asawa nga yara sa sulod sang balay agud makadto sa talamnan.

Nagsulod sa gate ang suspek kag gintiro si Adelantar nga naigo sa tuo nga porsyon sang tiyan.

Sa ikaduha nga pagtiro, nakahingagaw dalagan ang biktima gani wala naigo.

Sunod nga gintiro sang suspek ang 21-anyos nga bata nga babaye ni Adelantar nga nagahigda sa folding bed pero wala maigo.

Yara ang folding bed sa idalom sang puno sang kahoy sa tupad lang sang balay.

Kaupod sang babaye ang iya anum ka bulan nga lapsag nga nagahigda.

Nahulog pa ang lapsag sa folding bed sang naglikaw ang babaye sa pagtiro sa iya.

Ginapangita pa sang kapulisan ang suspek nga nalagyo pagkatapos sang krimen.

Suno sa Dumangas police, kasimaryo lang sang mag-amay ang suspek.

Sa pagpangusisa sang police, may daan nga hiligut-anon sa tunga sang suspek kag biktima.

Suno pa sa police, ginreklamo sadto sang suspek ang biktima tungod sa alegasyon nga gintayaan siya sang pusil.

Padayon nga ginabulong sa ospital sa syudad ang biktima. — Aksyon Paula Elambayo