ILOILO — Patay ang 17-anyos nga solterito sang ginbuno sa Brgy. Poblacion, Leganes pasado las-11:00 kagab-i.
Suno kay Police Captain General Enrique Robles, officer-in-charge sang Leganes Municipal Police Station, upod nga nag-inum inom sang makahulubog nga ilimnon sa tiyangge ang biktima nga si alyas Nonoy nga taga-Brgy. Buntatala, Jaro kag ang suspek nga si alyas Mike, 23-anyos nga residente sang Brgy. Poblacion, Leganes.
Indi magnubo sa lima ka indibidwal ang upod sang biktima kag suspek sang natabo ang insidente.
Sa imbestigasyon sang police, may pagbinaisay nga natabo sa tunga sang duha pero natambagan sang mga kaupod nila.
Sa ulihi, nagalakat ang biktima kag papuli na sang ginlagas sang suspek kag ginbuno.
Ginpahayag ni Robles nga nag-report sa police station ang mga involved kag upod ang biktima nga may pilas sa tiyan. Tungod sini, gilayon gindala sa ospital ang biktima pero gindeklarar nga dead-on-arrival.
Naghimo sang hot pursuit operation ang kapulisan kag natumod ang lokasyon sang suspek gani ginhaylo nga mag-surrender.
Detained sa Leganes Police Station ang suspek kag magapangatubang sang kaso nga murder. — Aksyon Paula Elambayo
