ILOILO — Yara na sa advanced state of decomposition ang dugong nga nasampay sa baybayon nga sakop sang Sitio Lacaran, Brgy. Ermita, Dumangas subong nga aga.
Suno kay Municipal Environment and Natural Resources Office (MENRO) Head Flosel Almirante, una nga nagpahibalo sa ila opisina ang manugpangisda sa lugar nga may nakit-an sila nga patay nga dugong.
Base sa pagpangusisa ni Almirante kahapon pa nasampay ang dugong sa lugar apang subong nga adlaw lang ini gin-report sa ila opisina.
Gilayon nga nag-coordinate si Almirante sa taga-Department of the Environment and Natural Resources (DENR) agud makuha sa lugar ang dugong.
Ginabanta sa 150 kilos ang kabug-aton sang dugong.
Ginpalubong na ini sang taga-MENRO.
Ang dugong isa ka sahe sang marine mammal nga ginatawag man nga sea cow kag mahilig magkaon sang sea grass.
