Dead-on-arrival sa ospital si Ibajay, Aklan Vice Mayor Julio Estolloso, 50-anyos, sang gintiro ni SB Member Mihrel Senatin sa sulod sang iya opisina las 9: 15 kaina sang aga.
Sa initial nga imbestigasyon sang police, nagsulod sa Sangguniang Bayan ang 43-anyos nga si Senatin kag nag-request sa pa sa mga staff nga hatagan siya sang kopya sang tanan nga ordinansa nga iya ginpasar sa iya termino.
Pagkatapos sini, ginpalapitan ni Senatin si Estolloso kag ginpamangkot kon ano ang iya sala kag gintiro ang biktima sang anum tubtob pito ka beses gamit ang Glock 17 pistol.
Gindala sa Ibajay District Hospital ang biktima pero napatay tungod sa igo sang mga bala sa wala nga porsyon sang dughan. Gilayon nga nadakpan ang SB member kag na-recover ang pusil nga gingamit sa pagpangtiro. Ginahibalo pa sang police ang motibo sa krimen.
Sa initial nga impormasyon, wala sang political rivalry ang duha tungod isa lang ka partido kag wala man sang personal conflict. — Aksyon Farrah Mae Morano
