ILOILO — Wala nasamaran ang pulis sang gintiro samtang naga-patrol sa Brgy. 6 Poblacion, Tigbauan pasado las-7 kagab-i.
Suno kay Police Captain Alfred Mansoy, officer-in-charge sang Tigbauan Municipal Police Station, naga-patrol sa dalan ang pulis nga nagaranggo Police Staff Sergeant upod ang duha pa ka pulis.
Samtang, naga-patrol ginflag-down sang kapulisan ang tatlo ka mga naga-angkasanay sa motorsiklo tungod wala sang suksok nga helmet.
Imbes nga magpundo, nagdiretso ang motorsiklo pakadto sa direksyon sang Brgy. Dorong-an gani ginlagas sang kapulisan.
Pag-abot sa amo nga barangay, natumba ang motorsiklo kag nagdalagan ang tatlo ka mga sakay nga lalaki. Nahibaluan nga mag-utod ang tatlo nga naga-edad 20-anyos,18-anyos kag 15-anyos.
Wala nakasulod sa area ang duha pa ka pulis tungod nagasakay sa mobile patrol samtang sa motorsiklo nagasakay ang pulis nga gintiro, suno kay Mansoy.
Gintiro sang 20-anyos nga lalaki ang pulis pero wala nasamaran tungod naigu ang holster sang iya pusil. Nautod ang trigger sang pusil gani wala nakapalupok ang pulis.
Na-rescue sang kapulisan ang 15-anyos nga lalaki sang nagdalagan. Ginturn-over naman sang amay sang mag-utod ang 18-anyos nga naga-drive sang motorsiklo sang natabo ang insidente.
Na-assign sa traffic investigation unit sang Tigbauan Police Station ang pulis nga natiruhan.
Padayon ang hot pursuit operation sang kapulisan sa 20-anyos nga utod. — Aksyon Paula Elambayo
