ILOILO — Naghabok ang wala nga mata kag napilasan sa nagkalain-lain nga parte sang lawas ang negosyante sang utan sang ginkastigo sang kasubong niya nga negosyante sa sulod sang public market sa Barotac Nuevo.
Suno kay alyas Jona, 19-anyos nga live-in partner sang biktima nga si alyas Jay sang Buenavista, Guimaras, nagpadulong sila sa merkado sang Barotac Nuevo agud istoryahon kuntani ang negosyante man sang utan nga si alyas Marjo parte sa iya P21,000 nga utang.
Apang may indi pag-intiendihanay nga natabo sang nag-atubangay ang duha tubtob nga nagsinggit si Marjo kag ginkastigo si Camingay.
Upod man nga nagkastigo ang duha ka bata nga lalaki ni Marjo.
Suno kay Police Lieutenant Johnny Bundac, Deputy Chief of Police sang Barotac Nuevo Police Station, ginrespondehan sang market guards ang insidente kag gindala sa police station ang mag-amay nga nagkastigo.
Ginsaysay ni Jona nga nagpangutang sang Mayo si Marjo kag wala nagbayad bisan makapila ka beses na nga ginsukot.
Kaina sang aga, nagpadulong sa police station sanday Jay kag Marjo para sa settlement lakip na ang pagbayad sang utang ni Marjo. —ARI Trainee Reporter Decyrrie Diamante
