ILOILO — Nasunog ang porsyon sang Agony Hill, halin sa ikawalo tubtob ika-14 nga station, sa Brgy. Taban-Manguining, Alimodian isa ka semana antes ang Semana Santa.
Ini ang ginkumpirmar ni SFO3 Arnold Pierre Cagro, Acting Municipal Fire Marshal sang Alimodian.
Natabo ang pagkasunog sang bukid pasado las-11 sang gab-i sang Marso 18, kag gin-anunsyar nga fireout pasado ala-1 na sang kaagahon sang Marso 19.
Suno kay Cagro, posible may nagtutod sa bukid nga amo ang ginhalinan sang kalayo.
Ginadula naman sang Alimodian BFP ang anggulo nga may hungod nga nagsunog sa porsyon sang bukid.
Sa pihak sini ginpasiguro ni Cagro nga safe para sa mga tumuluo ang pagkadto sa Agony Hill agud magpamalandong sa Biyernes Santo.
