ILOILO — Nag-ako ang 20-anyos nga suspek nga ginkawat niya ang naka-park nga motorsiklo sa Brgy. Poblacion, San Rafael kaina sang aga tungod gamiton sa pagsugat sa iya nobya.
Ini suno kay Police Lieutenant Francis Carona, officer-in-charge sang San Rafael Municipal Police Station.
Suno kay Carona, gin-park sang tag-iya ang motorsiklo sa atubang sang public market tungod may baklon. Ginpahayag sang police nga ginbilin sang tag-iya ang yabi tungod lapit lang ang iya ginbaklan.
Makaligad ang pila ka minutos, nagbalik ang tag-iya kag nakit-an nga wala na ang iya motorsiklo.
Nag-report sa police station ang tag-iya sang motorsiklo kag sa follow-up operation sang police na-identify paagi sa CCTV footage kag rouge’s gallery ang suspek.
Na-locate sang police ang suspek sa Barotac Viejo nga lugar sang iya nobya. Nagpalagyo pa ang suspek gamit ang ginkawat nga motorsiklo pero nadakpan, suno sa police.
Preso sa San Rafael Police Station ang suspek. — Aksyon Paula Elambayo
