ILOILO CITY — Naglab-ot sa P2.1 million nga balor sang suspected shabu ang na-recover sa menor-de-edad nga subject sa drug buy bust operation sa Barangay Tabuc Suba, La Paz las-10:23 kagab-i, Sept. 27.
Suno kay Police Major Marvin Villanueva, deputy chief sang Regional Police Drug Enforcement Unit (RPDEU), wala sila nakahibalo nga menor-de-edad ang subject tungod online ang ila transaksyon.
Dugang ni Villanueva, isa ka bulan ang monitoring sa subject nga si alyas Mok, 17-anyos halin sang nagguwa ang iya ngalan sa mga ginpangmitlang sang mga subjects nga una na nila nadakpan.
Ginkatingala man sang mga paryente sang solterito nga amo ang iya ginatineran sa La Paz, nga nagguwa pa siya bisan curfew na gani nakibot sila sang natukiban nga subject na siya sa buy bust operation.
Una nga nakuha sa posesyon sang solterito ang 210 grams sang suspected shabu nga may standard drug price nga P1.4 million.
Gin-turnover naman sang iya mga paryente ang daku nga putos sang suspected shabu nga nakuha nila sang gin-check ang kwarto sang subject.
Naglab-ot naman ini sa 100 grams kag may standard drug price nga P680,000.
Sa kabug-osan, nakumpiskar sa operasyon ang 310 grams sang suspected shabu.
Temporaryo nga nagatiner ang solterito sa iya paryente sa La Paz tungod sila na ang nagapaeskwela sa iya.
Yara naman sa Guimaras ang ginikanan kag iban nga utod sang solterito.
Na-turnover na ang solterito sa Balay Dalayunan. — Aksyon Maria Kayla Tingzon
