ILOILO CITY – Nagpa-blotter sa police station ang driver sang motorsiklo sang ginlagas kag ginhana nga labu-on sang binangon sang driver ang Blue taxi sa national highway sakop sang Brgy. Ungka, Jaro sang Nobyembre 11.
Suno kay Police Captain Dexter Sevilla, hepe sang Police Station 9 sa MH del Pilar, Jaro, natingala ang tagreklamo nga masami siya ginabusinahan samtang nagamaneho gani nagpahigad siya, pero gin-cut siya sang Blue taxi.
Nagpanaog ang taxi driver kag ginba-is ang tagreklamo tungod sa trapiko.
Wala pa nakuntento ang taxi driver, nagbalik siya sa iya salakyan kag nagkuha sang binangon nga ginabanta nagalaba sang 22 pulgada.
Tungod sa kakulba, nagpalagyo ang tagreklamo, ginlagas siya sang taxi driver pero wala malab-ut. Sang nagbalik ang taxi driver sa iya salakyan, nakakita sang tsansa ang tagreklamo kag ginkuhaan sang video ang taxi driver.
Nagreklamo naman ang duha ka pasahero sang taxi, pero wala na nagpa-blotter.
Gilayon nga ginkadtuan sang mga pulis ang opisina sang Blue taxi makaligad nabaton ang reklamo kag natabuan nga ara ang driver gani gindala siya sa police station.
Nagpangayo sang pasensiya ang taxi driver kag ginrason nga nagdala siya sang binangon tungod ipaba-id niya kuntani para magamit sa ila balay.
Sa impormasyon sang Aksyon Radyo Iloilo, indi na pagbalikon sa trabaho ang taxi driver.
