ILOILO CITY – Minilyon nga recoveries sang suspected shabu ang nakumpiskar sang Regional Police Drug Enforcement Unit (RPDEU) sa mga-amay nga subject sa drug bust operation kag search warrant.
Las-8:15 sang gab-i sang Nobyembre 9 sang nadakpan sa drug bust operation sa Brgy. Tanza, City Proper ang mag-amay nga alyas Mamong, 44-anyos kag iya bata nga si alyas Feb, 23-anyos.
Na-recover ang 85 grams nga kabug-aton sang suspected shabu kag may standard drug price nga ₱500,000. Nagabaligya sang isda ang amay nga nakaagi na dakup sang 2015 tungod man sa kaso may kaangtanan sa illegal drugs.
Sa monitoring sang kapulisan, ginakabig nga distributor kag bodegero sang illegal nga druga ang mag-amay gani gin-implementar ang search warrant sa ila balay sa Brgy. Hibao-an Sur, Mandurriao.
Sa search warrant, na-recover ang 170 grams nga kabug-aton sang suspected shabu nga may market value sang ₱1,156,000. Magluwas sa suspected shabu, na-recover man ang digital weighing scale kag iban pa nga drug paraphernalias.
Suno kay Police Major Glen Soliman, team Leader sang RPDEU, ang amay duha na ka tuig ang monitoring tungod sa on and off ang operasyon sa pagbaligya sang illegal nga druga.
Ginpahayag sang pulis nga may contact sa presuhan ang bata nga amo ang nagakuha sang supply kag ginabaligya sa probinsiya kag syudad sang Iloilo.
