ILOILO CITY — Ginhaylo ni Land Transportation Office (LTO) 6 Director Gaudioso Geduspan ang mga motorista nga magparehistro kag magkuha sang licensed plate agud indi magbayad sang multa kon madakpan.
Tungod ini sa natalana nga pagpangdakop sang LTO 6 sa Oktubre 15 sa mga motorista nga nagagamit sang temporary ukon improvised nga plaka.
Wala na sang rason agud indi magkuha sang licensed plates ang mga nakarehistro nga motorista tungod wala na sang backlog ang LTO.
Sang Agosto, nagpatuman ang LTO 6 sang “Oplan: Stop, Plate and Go” sa Iloilo City sa diin ginpang-flag down ang mga motorsiklo nga wala sang plaka kag ginapangitaan sang Official Receipt (OR) and Certificate of Registration (CR).
Gina-check sang team sang LTO upod ang registration unit kon may naka-assign na nga plaka ang motorsiklo nga wala lang na-claim kag gina-giyahan ang driver sang iya obrahon agud makuha ini.
Base sa assessment sang LTO, ginpahayag ni Geduspan nga sa 10 ka mga nagparehistro, isa lang gid ang nagabalik agud magkuha sang plaka.
Tungod sini, mapatuman sang “No plate, No travel” policy ang ahensiya sa Panay kag Guimaras, samtang sa Nobyembre 1 naman ipatuman ang amo nga polisa sa bilog nga pungsod.
Ginpahanumdom ni Geduspan ang mga motorista nga indi man sila makapa-emission test kag makapa-inspeksyon sang salakyan kon wala sang licensed plate.
