ILOILO CITY — Ginpakigbahin sang maestro sa social media ang iya na-eksperyensyahan samtang nagahulat sang jeep sa atubang sang Iloilo National High School kahapon, Oktubre 8.
Base sa Facebook post sang maestro, samtang nagahulat sang jeep, may nagpalapit nga bata sa iya, ginabanta pito tubtob 10 ka tuig ang edad kag nagpangayo sang kwarta.
Sang wala naghatag sang kwarta ang maestro, ginpamangkot siya sang bata sang password sang iya cellphone pero nagsabat siya nga, “secret”.
Gulpi lang naghambal ang bata sang, “kon holdapon ta ka bi” kag ginkuha ang gunting sa bulsa kag gintaya sa maestro.
Sa kakulba sang maestro, gintago niya ang cellphone kag gin-istorya ang bata. Gilayon man nga naglakat ang bata.
Nagapangabay ang maestro sa publiko nga mag-aligmat kag mangin alerto tungod sa natabo. — Aksyon Paula Elambayo
