ILOILO — Pasakaan sang kaso nga murder ang barangay tanod nga suspek sa pagtiro sa nagabulig sa manokan sa Brgy. San Antonio, Oton kahapon sang aga, Oktubre 18.
Suno kay Police Lieutenant Colonel Ahlie Estember, hepe sang Oton Municipal Police Station, nagbinaisay tungod sa ginahimo nga brooding pen para sa mga inugbulang nga manok ang suspek kag biktima kahapon.
Yara sa impluwensiya sang makahulubog nga ilimnon ang biktima sang nagkadto sa manokan kag nagbaisay sila sang suspek kaina sang aga.
May upod ang suspek pero nagguwa tungod may ginbakal.
Nagaguwa sa imbestigasyon sang police nga sang nagbinaisay, ginkuha sang biktima ang ginataklos nga kutsilyo kag ginhana nga bun-on ang suspek.
Nagpalupok sang makaduha ka beses ang suspek sa idalum bilang warning shot pero sang nagapalapit ang biktima, gintiro niya sa ulo.
Pagkatapos sang krimen, nagpauli ang suspek sa ila balay kag didto naabtan sang mga pulis.
Na-recover ang calibre .45 nga pusil sa suspek.
Preso na sa Oton Police Station ang suspek.– Aksyon Paula Elambayo
