Nagapasalamat si Dante Ambanloc sa ikaduha nga kabuhi sang iya pamilya matapos nakaluwas sang natumbahan sang puno sang lubi ang ila balay sa Brgy. Concordia Sur, Nueva Valencia, Guimaras sa tunga sang paglaslas sang Bagyo Tino kahapon.
Suno sa iya, tapos na sila panyaga sang gulpi lang nabatian ang pagragamak sang atop tubtob nga indi na siya makahulag tungod napilpilan siya sang natumba nga lubi.
Gin-ako ni Dante nga nagahibi na siya tungod daw indi na siya makaginhawa kag nagapangamuyo na lang nga makita kuntani ang iya pamilya.
Na-trap man sa sulod ang iya partner nga si Mary Joy Nava kag duha nila kabataan, pero nakakamang sila paguwa.
Nagapasalamat si Dante sa pagbuligay sang mga pumuluyo kag kapulisan nga nahakwat ang lubi kag nakaguwa siya.
Nakaagum sang pilas sa guwa si Dante. Wala naman napilasan ang iya partner kag duha ka kabataan.
Nagapangayo sang bulig si Dante nga makapatindog sila sang balay tungod naguba gid ini sang natumbahan sang lubi.
