ILOILO CITY — Ginpuhag sang bomb threat ang University of San Agustin extension campus sa Sambag, Jaro kaina sang aga.
Nakabaton sang text message ang mga manunudlo nga may ginbutang nga duha ka bomba sa kindergarten kag apat sa main building sang eskwelahan.
Nabutang man sa mensahe nga ginhimo ang bomb scare tungod sa “unjust treatment” sang mga manunudlo sa mga estudyante.
Tungod sini, gintipon ang mga estudyante kag ginpapati nga may fire drill agud indi makulbaan.
Ginpahibalo gilayon sang school administrator ang mga ginikanan kag guardians nga sugaton ang ila kabataan para sa safety, samtang gina-imbestigaran sang mga otoridad ang insidente.
Sang ginkadtuan sang taga-Explosive and Ordnance Disposal Unit ang eskwelahan, wala sang may nakita nga bomba.
Ginpaathag ni Police Captain Mavin Laraño, hepe sang Police Station 3 sa Jaro nga bisan wala sang nakita nga bomba, nagapadayon gihapon ang ila imbestigasyon agud matumod kon sin-o ang nagpadala sang mensahe. — Aksyon Angel Mae Ciudad/Farrah Mae Morano
