ILOILO CITY — Ginsunog sang 48-ayos nga laborer ang iya balay sa Brgy. Tanza Baybay, City proper pasado las-12 subong nga udto.
Gin-ako ni Ton nga siya ang nagsunog sang balay tungod ginaproblema niya nga wala ang iya bata sa iya poder.
Separado si Ton sa iya live-in partner kag may bata nga Person with Disability (PWD) nga yara subong sa iya iloy.
Yara sa impluwensiya sang makahulubog nga ilimnon si Ton sang ginsunog ang iya balay. Sa pagpamangkot sang news team kay Ton, gintipon niya ang ila mga bayo kag gintutdan gamit ang lighter gani madasig nga nagdaku ang kalayo.
Nagbinuligay naman ang mga residente gani gilayon nga napalong ang kalayo. Partially-damaged ang balay ni Ton.
Suno kay Brgy. Kagawad Dominador Deocampo, makapila na ka beses nga napreso si alyas Ton tungod masami nga nagamaoy sa ila lugar. — ARI trainee Robert Nietes
