Soft opening sang Jaro, La Paz, kag Arevalo Public Markets hiwaton sa Disyembre

ILOILO CITY — Hiwaton ang soft opening sang tatlo ka gin-rehabilitate nga merkado sa Iloilo City — Arevalo, Jaro, kag La Paz sa masunod nga bulan.

Buksan ang Arevalo Public Marketsa Disyembre 1; ang Jaro Public Market sa Disyembre 10; kag ang La Paz Public Market sa Disyembre 16.

Suno kay Councilor Mandrie Malabor, chairman sang Committee on Markets and Slaughterhouse, gina-amat-amat na subong ang pag-adjudicate sang mga puwesto sa mga vendors agud makasulod kag makaplastar na sa bag-o nga merkado.

Yara pa lang sa ginabanta 50 porsyento sang mga vendors sa tatlo ka merkado ang naka-secure na sang puwesto, kag may mga talapuson pa nga obra.

Indi pareho sa Iloilo Terminal kag Central Markets nga gin-renovate sa idalom sang public-private-partnership, ang Arevalo, Jaro, kag La Paz nga mga merkado ang gin-renovate gamit ang pondo sang siyudad.

Pebrero 2022 ginsuguran ang pagplano sa pag-renovate sang tatlo ka mga merkado. — Aksyon Marvin Malificiar