P1.1 million nga balor sang suspected shabu nakumpiskar sa drug buy bust operation sa Brgy. Quintin Salas, Jaro

ILOILO CITY — Na-recover sa drug bust operation nga gin-conduct sang Regional Police Drug Enforcement Unit (RPDEU) 6 ang P1.1 million nga balor sang suspected shabu kagab-i, Sept. 23.

Suno kay Police Major Marvin Villanueva, deputy chief sang RPDEU 6, sa balay sang subject nga si Tenks, 46-anyos, natabu ang operation sa diin upod niya nga nadakpan kanday alyas Bords, 39-anyos nga iya upod sa mga illegal drug transactions kag alyas Kevin, 20-anyos kag Arvin, 35-anyos. nga ila mga parokyano.

Nakaagi preso sang 2009 sa kaso may kaangtanan sa illegal nga druga si Tenks pero nakaguwa sang 2021 paagi sa plea bargaining agreement.

Ginpabutyag ni Villanueva nga sa Bacolod City ang source sang mga subjects kag sa bug-os nga siyudad nila gina-distribute ang illegal nga druga.

Naglab-ut sa 23 ka sachets sang suspected shabu nga ginabanta nagabug-at sang 170 grams ang nakuha sang otoridad. — Aksyon Maria Kayla Tingzon