Duha ka mga pusil ang nakuha sa anay bodyguard sang politiko sa Mindanao, sang ginserbihan sang search warrant sa iya balay sa Barangay Pandan, Lambunao las-7 kaina sang aga.
Suno kay Police Lieutenant Marlon Ayson, officer-in-charge sang Criminal Investigation and Detection Group (CIDG) Iloilo Provincial Field Unit, may concerned citizen nga nag-report sa ila tungod masami makit-an ang subject nga si alyas Randy, 52-anyos, nga nagataklos sang pusil kon magguwa sa ila balay.
Sa kahangawa nga makapalupok si Randy, ginpahibalo na ini sang concerned citizen sa otoridad.
Nakuha sa sulod sang balay ni Randy ang Caliber 45, magazine kag mga bala sini kag Caliber 22 rifle.
Sa impormasyon nga nabaton sang mga pulis, nakaagi na palupok sang pusil si Randy sa ila barangay pero sang madugay na nga tion kag wala na nasulit.
Ginpabutyag man ni Randy nga ginpanubli lang niya ang mga pusil kag ginagamit pangdepensa tungod nagasagod siya sang mga manok nga inugbulang.
Nangin bodyguard si Randy sang politiko sa Mindanao kag may huring-huring nga amo man ang iya trabaho sa mayor sang banwa pero wala ini sang pamatuod, suno kay Ayson.
Sa pag-check sang CIDG, wala sang License to Own and Possess Firearms kag Permit To Carry Firearm Outside of Residence si Randy.
Yara si Randy sa kustodiya sang CIDG Iloilo Provincial Field Unit kag pasakaan sang kaso nga paglapas sang Republic Act No. 10591 ukon Comprehensive Firearms and Ammunition Regulation Act. — Aksyon Maria Kayla Tingzon
