ILOILO CITY–Gina-target sang Iloilo City Government nga i-transform nga mangin Sponge City ang siyudad sugod sa masunod nga tuig paagi sa pag-invest sa disaster resilient infrastructures pareho sang permeable pavement.
Ang Sponge City isa ka urban model nga nagapakita sang green infrastructure pareho sang green roofing, rain gardens, rainwater harvesting and storage, kag permeable pavements nga naga-absorb sang tubig dala sang ulan agud tipunon tubtob nga i-release pag-abot sang tion nga kinahanglan na ini.
Ginpabutyag ni Mayor Raisa Trenas nga isa ini sa rekomendasyon sa ulihi nga meeting sang City Disaster Council antes magtakop ang 2025 para sa ila himuon nga approach sa masunod nga tuig.
Isa ini sa mga ginakonsiderar nga solusyon sa nagalala nga problema sang pagbaha sa siyudad.
Matandaan nga una man ini nga ginsuhestiyon ni Engr. Melvin Purzuelo nga leader sang Green Forum Panay-Guimaras kag isa ka environmental advocate.
Ginpabutyag man ni Treñas nga padayunon sang siyudad sa masunod nga tuig ang mga inisyatibo sa pagsolbar sa mga problema sa climate change kag iban pa nga environmental issues. — Aksyon Marvin Malificiar
