ILOILO CITY— Gin-anunsyar sang Iloilo Festivals Foundation, Inc. (IFFI) ang pagbalik sang Dinagyang Tribes Competition sa City Proper sa masunod nga tuig.
Ginpabutyag ni IFFI Chairman Judgee Peña nga ginpamatian kag ginkonsiderar ang hingyo sang publiko sa pagtapos sang Dinagyang Festival 2026 nga napun-an sang kontrobersiya.
Suno kay Peña, “ihatag sang IFFI kon ano ang luyag sang pumuluyo.”
Ginpabutyag ni Peña nga bisan sa iya pag-assess nangin maayo kag matawhay ang ruta sang judging areas subong nga tuig, i-prioritize nila gihapon ang sentimiyento sang mga Ilonggo.
“Indi kita tag-iya sina (sang Dinagyang). Sulugu-on lang kita sini, that’s why ang IFFI gapamati sa hambal sang pumuluyo. Ang tanan nga ginakomentar dira ginapamati-an namon. Wala namon ginasupak,” dugang pa ni Peña.
Ginakabig ni Peña nga “successful” ang kahiwatan kag pamatuod diri ang pagdagsa sang tawo sang highlights sang kapistahan ilabe na sang awarding ceremony sang Enero 25 sang gab-i.
Madumduman, may tatlo ka judging area subong nga tuig, sa Freedom Grandstand, Luna-Huervana sa La Paz, kag Sports Complex. — Aksyon Marvin Malificiar
