ILOILO — Nakuhaan sang P1.3 million nga balor sang suspected shabu ang ginakabig bodegera sang illegal nga druga sa Barangay Marong, Lambunao subong nga hapon.
Suno kay Police Lieutenant Gabriel Manguera, officer-in-charge sang Lambunao Municipal Police Station, subject sa operation si alyas Jean, residente sang nasambit nga barangay, ang nagbulos sa pagbaligya sang illegal nga druga sang nadakpan ang iya utod nga si alyas Kubo sang Enero 24.
Ginpabutyag ni Manguera nga pareho nga ginsugid sang mag-utod nga si alyas Popoy ang naga-supply sa ila sang illegal nga druga.
Pero nagpamalibad si Manguera sa paghatag sang impormasyon may kaangtanan sa lokasyon sang nasambit nga supplier tungod padayon pa nila gina-imbestigaran ang impormasyon.
Magluwas sa Lambunao, nagalab-ot man ang subject sa pagbaligya sang illegal nga druga sa Pototan kag Badiangan.
Na-recover sa operasyon ang tatlo ka gagmay kag duha ka dalagko nga pinutos sang suspected shabu nga ginabanta nagabug-at 200 gramos. — Aksyon Maria Kayla Tingzon
