Iloilo City – Ginaduso sang Association of Taxi Operators in Panay (ATOP) ang provisional increase sa pamasahe sa taxi tungod sa pagmahal sang presyo sang gatong, nga epekto sang giyera sa Middle East.
Ginplastar ni ATOP President, Engr. Perfecto Yap nga mapatuman na lang sang matrix scheme ang mga taxi units, depende sa kon pila ang presyo sang gatong.
Sa subong, P50 ang flagdown rate sa taxi sa siyudad.
Base sa ginaduso nga matrix scheme sang ATOP, ginhalimbawa ni Yap nga kon naga-range ang gatong sa P60 tubtob P70 kada litro, madugang sang P10 sa P50 nga flagdown rate. Pero wala na sang increase sa rate sa succeeding four kilometers.
Antes magsakay ang pasahero, dapat nga iplastar sang taxi driver kon pila ang presyo sang gatong, ipakita ang matrix agud mahibaluan kon pila ang idugang sa flagdown rate.
Ginpanindugan ni Yap nga katuyuan man nila nga indi mapierde ang mga taxi drivers kag may income sila nga mapauli sa ila pamilya.
Ginpaathag ni Yap nga pa-aprubahan pa nila sa Land Transportation Franchising and Regulatory Board (LTFRB) ang matrix scheme antes ipatuman.
