ILOILO — Arestado ang mag-abyan sa drug buy bust sa Barangay Cubay, Lambunao kahapon, Agosto 18. Nakuhaan kanday alyas Ian kag alyas Gina nga ginakabig street level individual, sang anum ka sachets sang suspected shabu nga nagabalor sang P81,600.
Suno kay Police Captain Jose Winston Biadog, hepe sang Lambunao Police Station, duha ka semana nga gin-monitor ang subjects antes nadakpan.
Naghalin sa Passi kag Iloilo City ang source sang illegal drugs sang subject kag ginabaligya sa nagkalain-lain nga barangay sang Lambunao.
Sa impormasyon sang police, tokhang surrenderer si Ian. — ARI trainee reporter Robert Nietes
