ILOILO CITY — Pilas sa tuo nga parte sang likod ang na-agum sang 66-anyos nga laborer sang ginbuno sang 47-anyos nga lalaki sa Brgy. Sto. Niño Norte, Arevalo kahapon, Agosto 17.
Ginkilala ang biktima kay alyas Boyet, samtang ang suspect amo si alyas Totoy.
Antes sang insidente, nag-check in sa resort sa Brgy. Sto. Niño Norte si Boyet kaupod si alyas Bayang, 64-anyos.
Suno kay Patrolman Reylen Macuja, imbestigador sang Iloilo City Police Station 6, may nagpanugid kay Totoy nga nag-check-in sa resort kanday Boyet kag Bayang.
Magkarelasyon sadto kanday Totoy kag Bayang, suno sa police.
Ginkadtuan ni Totoy ang resort kag sang nakit-an nga nagguwa sa kwarto si Bayang iya gin-istorya sa status sang ila relasyon.
Samtang naga-istoryahanay, naguwa man sa kwarto si Boyet. Ginhambalan ni Totoy si Boyet nga maglakat na agud makapadayon sila sa pagsugilanon ni Bayang.
Ginpahayag sang police nga nagsabat si Boyet sang, “ngaa, isog ka gid haw?”
Tungod sini, ginkuha ni Totoy ang ginataklos niya nga kutsilyo kag ginbuno si Boyet.
Naigo sa likod si Boyet kag natalana operahan.
Pareho nga yara sa impluwensiya sang makahulubog nga ilimnon ang duha sang natabo ang insidente, suno sa police.
Ginpulihan naman sapote sang mga residente si Totoy sang nakit-an ang natabo.
Pagpangimon ang ginasundan nga anggulo sang police.
Preso sa Police Station 6 si Totoy kag pasakaan sang kaso nga frustrated homicide. — Aksyon Paula Elambayo
