ILOILO CITY — Patay ang 35-anyos nga negosyante sang ginbuno sang iya abyan nga construction worker sa Brgy. Guzman-Jesena, Mandurriao kahapon sang kaagahon, Agosto 17.
Suno kay Police Lieutenant Glery Perante, deputy chief sang Police Station 5 sa Mandurriao, pareho nga nagtambong sa birthday party sang ila abyan ang suspek kag biktima.
Sa imbestigasyon sang police, nagbaisay ang duha tungod nag-ayo ang biktima sa suspek nga may ipaobra pero nagpamalibad ang suspek tungod may obra siya sa construction.
Antes natabo ang pagpangbuno, nagaguwa sa imbestigasyon sang police nga gintawag sang suspek ang biktima kag gulpi lang gintampa.
Tungod sini, ginbuno sang suspek ang biktima nga naigo sa tuo nga ilok, dughan, pusod kag siko.
Gindala pa sa ospital ang biktima pero gindeklarar nga dead-on-arrival.
Pareho nga naka-inom sang makahulubog nga ilimnon ang duha, suno sa police.
Preso sa Police Station 5 ang suspek kag pasakaan sang kaso nga homicide. — Aksyon Paula Elambayo
