ILOILO— Ginaka-alarma sang Police Regional Office 6 (PRO6) ang estado sang illegal nga druga sa rehiyon, ilabe na sa Iloilo.

Ini tungod madamo sang barangay officials nga nagakadakpan sa mga drug bust operations suno kay PRO6 Director PBGEN Josefino Ligan.

Pamatuod man ini suno sa opisyal nga wala sila sang ginpili sa ila ginapangdakup.

Gin-athag man ni Ligan nga wala sang “drug lord” sa rehiyon kag may lain-lain nga linyada ang mga naga-engage sa illegal nga druga.

Sa monitoring sang kapulisan sa National Capital Region (NCR) sa Luzon nagahalin ang supply sang illegal nga druga nga nagasulod sa rehiyon.

Ginakonsiderar niya ang lokasyon sang rehiyon sa diin madamo sang puwede lutsan ang mga ilegalista para lang makapasulod sang illegal nga druga.

Ginpabutyag ni Ligan nga nagapadayon ang mga operasyon sang otoridad tubtob nga mauntat na ang paglapta sang illegal nga druga.

Sa datos sang PRO6 sa bulan sang Pebrero, naglab-ot sa P74 million ang balor sang illegal nga druga nga na-recover sa bug-os nga rehiyon. — Aksyon Maria Kayla Tingzon