ILOILO CITY — Patay samtang ginabulong sa ospital ang 40-anyos nga nagabisikleta sang nabungguan kag nayudyod sang modernized jeep pakadto sa Caltex Molo Station.
Halin sa Mohon terminal ang driver kag ma-liko kuntani sa gasolinahan apang gin-atake sang stroke kag nabungguan ang ginasundan nga nagabisikleta.
Nawarik sang driver ang iya manibela tubtob nga nayudyod ang biktima pakadto sa gasolinahan.
Suno sa empleyado sang gasolinahan nga si Ryan, nakita niya nga ginayudyod sang modernized jeep ang nagabisikleta pakadto sa Caltex gasoline station tubtob nakabunggo sa stopper sang gasolinahan.
Ginpulpog pa ni Ryan ang kilid sang jeep sang nakita ang natabo sa pagpati nga wala magalupamngdan sang driver pero naghambal ang mga pasahero nga na-stroke ang driver.
Napak-it ang panit sang biktima sa tiyan tungod sa pagyudyod sa iya.
Ginabanta naga-edad sang 50 ang nagabisikleta suno kay Ryan.
May mga pasahero ang modernized jeep apang wala sang may nasamaran sa insidente.
Sa pagpangusisa sang Aksyon Radyo Iloilo news team, ginkilala ang driver sang modernized jeep kay Conrado Labrador, 58-anyos sang San Juan, Molo. May yara siya sang kumpleto nga medical test kag wala sang balatian.
