ILOILO — Masobra P1.5 million nga balor sang suspected shabu ang na-recover sang City Drug Enforcement Unit (CDEU) sa magtiyo nga subject sang drug buy-bust operation kag pagserbe sang search warrant sa Brgy. Bakhaw, Mandurriao.
Subject sang operasyon kanday alyas Pato, 26-anyos, kag iya tiyo nga si Nonoy, 47-anyos.
Una nga gin-operate ang magtiyo kag na-recover ang lima ka grams sang suspected shabu nga may standard drug price nga P34,000.
Pagkatapos sini, ginserbe sang CDEU ang search warrant kag na-recover sa balay ni Pato ang 210 grams sang suspected shabu nga may standard drug price nga P1.4 million kag .38 caliber revolver.
Suno kay CDEU head Captain Roque Gimeno III, si Pato ang ginatudlo nga naga-supply sang illegal drugs sa mga personalidad nga nadakpan sa nagligad nga drug buy bust operation.
May ginatago nga daku nga supply sang illegal nga druga si Pato sa ila nga balay gani sa guwa siya nagatransaksyon, suno sa pulis.
Ini man ang rason nga nagserbe sang search warrant ang pulis sa balay ni Pato tungod na-monitor nga madamo sang illegal nga druga.
Gina-follow up na subong sang pulis ang ginakuhaan pa gid ni Pato sang supply. — Aksyon Farrah Mae Morano
