ILOILO CITY — Dead-on-arrival sa ospital ang asawa nga angkas sang nalasakan sang garbage truck ang ginasakyan nga motorsiklo sa Diversion Bridge, Mandurriao kaina sang aga.

Sa impormasyon sang Traffic Enforcement Unit, nagasunod sa motorsiklo ang garbage truck nga nakabunggo.

Natumba ang motorsiklo kag nalasak sang garbage truck ang asawa.

Nawasak ang helmet sang asawa nga may daku nga pilas sa ulo.

Napilasan man ang bana gani gindala sila sa ospital.

Nangindulaan ang driver sang garbage truck pero nahibaluan nga nagpadulong siya sa police station sa kakulba nga pulihan siya sang mga tawo.

Pasakaan sang kaso nga reckless imprudence resulting in homicide ang driver sang garbage truck.