ILOILO CITY— Sa boto nga 13-1 sa session sang Sangguniang Panlungsod, gin-adoptar sang mayoriya sang konseho ang committee report kag resolusyon nga nagapatuman sang DILG Opinion No. 95, series of 2025 agud limitahan ang poder ni Vice Mayor Lady Julie Grace Baronda.
Sa resolusyon nga ginduso ni Councilor Romel Duron, gin-adoptar ang DILG opinion agud ilakip sa Internal Rules of Procedure (IRP) sang konseho sang siyudad.
Ang kaalyado lang ni Baronda sa minority nga si Councilor Sheen Marie Mabilog ang nagboto indi pabor.
Sa idalom sang DILG Opinion No. 95 series of 2025 nabalhag nga ginakuhaan sang prebilihiyo nga mag-introduce ukon sponsor sang legislative measure, magpamuno sa komitiba, magpartisipar sa debate, ukon mag-deliver sang privilege speech ang bise alkalde.
Ang papel na lang sang bise alkalde amo ang mag-preside sang session kag mag-divide sang boto sa session sa tion sang tie.
24 ka pahina ang committee report sang committee on rules nga gindebatehan sa session antes gin-adoptar kag ginpasar ang resolusyon.
