ILOILO — Pilas sang pagkalabu sa ulo ang gintunaan sang kamatayon sang mangunguma sa Barangay Jayobo, Lambunao mga las-9 kagab-i.

Suno kay Police Lieutenant Vincent Garcia, officer-in-charge sang Lambunao Municipal Police Station, tungod sa kahulugbon wala nag-intindihanay ang biktima nga si alyas Nito, 40-anyos kag ang mga suspetsado nga kanday alyas Erwin kag Henan, lunsay residente sang Barangay Tigbayog, Calinog.

Una nga ginlabu ni Erwin si Nito sa ulo kag ginsundan ni Henan sa diin naigo ang biktima sa wala nga abaga.

Nagatipon pa sang dugang nga impormasyon ang kapulisan agud mahibaluan ang madalom nga rason sang mga suspek sa paglabu sa biktima.

Sa nabukid nga porsyon sang barangay natabu ang insidente gani mga las-9 kaina sang aga na napahibalo sang kapitan sang barangay, ang kapulisan sa natabu.

Napapanaug na halin sa bukid ang bangkay sang biktima kag yara na sa ospital sa Lambunao. — Aksyon Maria Kayla Tingzon