ILOILO — Nakapalupok sang pusil ang isa sa tatlo ka mga subjects sa drug bust operation sa Barangay Pulao, Dumangas kaina sang kaagahon sang namutikan nga pulis ang ka-transaksyon.
Subject sa operasyon kanday alyas Small, 39-anyos nga amo ang nakapalupok, alyas Jan-jan, 33-anyos kag alyas JR nga nakapalagyo.
Na-recover sa subjects ang 135 grams sang suspected shabu nga may standard drug price nga P918,000.
Suno kay Police Major Kenn Albert Lepsia, hepe sang Dumangas Municipal Police Station, sa masiot nga parte sang barangay natabo ang transaksyon kag sang nahibaluan ni Small nga pulis ang iya ka-transaksyon, nagbalik sila sa iya salakyan.
Samtang pabalik, nagpalagyo na si JR.
Nakasakay na sila Small kag Jan-jan sa salakyan pero may mga pulis na sa palibot gani nagpalupok si Small.
Nagpalupok man ang mga pulis amo nga madamo sang igo ang windshield. May igo man sa puwertahan sa likod sang salakyan.
Ginpabutyag ni Lepsia nga wala sang napilasan.
Nagdesisyon na lang nga mag-surrender ang mga subjects sang nag-atras ang salakyan pero nakabunggo sa puno sang lubi kag indi na makahalin.
Sa monitoring sang pulis, duha pa lang ka bulan nga nakaguwa sa presuhan si Small, sa kaso may kaangtanan sa illegal nga druga pero liwat nga nagbaligya.
Nagaserbe naman nga bodyguard ni Small kag upod sa pagbaligya kanday Jan-jan kag JR. — Aksyon Maria Kayla Tingzon
