ILOILO — Dakup ang apat ka mga Street Level Individuals (SLI) sa drug buy bust operation sa Brgy. Cabunga, Passi City.
Lakip sa mga nadakpan ang 44-anyos nga si alyas Nongnong nga barangay tanod sa nasambit nga lugar. Upod man si alyas Vince, 21-anyos nga tricycle driver sang Brgy. Tubod, kag mga laborer nga sanday alyas Mark, 36, sang Brgy. Gemat-y, kag alyas Ambok, 32, nga residente sang Brgy. Tuburan.
Sa impormasyon nga nakalab-ut kay Police Staff Sergeant Lennie Rose Piamonte, Information Officer sang Passi City Police Station, ginahimo nga drug den sang mga subjects ang balay ni alyas Nongnong.
Duha ka semana ang ginhimo nga monitoring sang kapulisan antes gin-operate ang mga subjects. Na-recover ang anum ka sachets sang suspected shabu nga nagabug-at sang 15 grams nga may standard drug price nga P102,000 kag buy bust money nga P1,100
Sa pag-imbestigar sang Passi City police, duha ka bulan na nga naga-operate ang mga nadakpan kag sa Pototan sila nagakuha sang supply sang illegal drugs kag ginabaligya sa mga barangay sa Passi City.
