ANTIQUE— Nasalbar ang tatlo ka sakay sang baruto nga nagkapan sa kadagatan sang Culasi tungod nakapangayo sang bulig ang 12-anyos nga dalagita paagi sa paglangoy sang ginabanta anum ka oras pakadto sa isla.
Suno kay Mr. Broderick Train, department head sang PDRRMO- Antique, las-11 sang Mayo 6 sang aga sang papuli na sa Batbatan, Culasi halin sa Poblacion ang baruto nga may apat ka mga sakay.
Nakasumalang sang balod kag mamadlos nga hangin ang baruto gani nag-capsize.
Agud makapangayo sang bulig, ginlangoy sang 12-anyos nga si Cherry Ann Mateo ang kadagatan pakadto sa isla.
Ginabanta sa lima ka kilometros ang kalayuon sang ginlangoy ni Mateo kag naglab-ut sa anum ka oras tubtob nakalab-ut sa baybayon sang Batbatan. Diri kag nakapangayo sang bulig si Mateo.
Na-rescue la-una na kahapon sang kaagahon, Mayo 7, ang upod ni Mateo nga kanday Angelita Patricio, 58-anyos, kag Rose Salvador, 49-anyos nga nagpanguyapot gihapon sa baruto pero gin-anod na sa kadagatan sang Libertad, Antique.
Samtang si Dante Salvador, 60-anyos, nga crew sang baruto nakita malapit sa Maniguin Island, Culasi.
Suno kay Train, ginabanta sa isa ka oras kag tunga ang pagbiyahe halin sa Poblacion pakadto sa isla Batbatan, Culasi kon baruto ang sakyan.
Ginapanginbulahan sang PDRRMO ang ginhimo ni Mateo. — Aksyon Farrah Mae Morano
