ILOILO — Pilason ang tatlo ka mga kabulig sa arosera sa Barangay Jovellar, Igbaras sang ginbuno sang ila upod sa obra sang Mayo 9 sang gab-i.
Suno kay Police Lieutenant Hedion Cabaya Jr., deputy chief of police sang Igbaras Municipal Police Station, indi pag-intiendihanay may kaangtanan sa ila mga sweldo ang gin-awayan sang suspect kag mga biktima.
Nagguwa sa imbestigasyon nga nagpukutay ang apat tubtob nadamhagan sang mga biktima ang suspect nga si alyas Nonoy, 33-anyos nga taga-Antique.
Ginlab-ot ni Nonoy ang botelya sang ilimnon kag ginbuka nga amo ang iya gingamit buno sa mga biktima.
Nakaagum sang pilas sa wala nga kamot kag magtimbang nga abaga si alyas Boyboy, 21-anyos, sa wala nga ilok naman ang pilas ni alyas Toto, 24-anyos kag napilasan sa tuo nga kamot ang solterito nga si Andrew.
Nadakpan ang suspect kag yara na sa kustodiya sang Igbaras police.
Ginaproseso na ang mga dokumento kag mga ebidensiya agud mapasakaan sang kaso nga frustrated homicide ang suspect. — Aksyon Maria Kayla Tingzon
